కల్హార

కొసరి కొసరి గ్రోలకే గండు తుమ్మెదా
ముసిరి ముసిరి తేనెలతో కన్నె పూ యద

పసి కుసుమం పిలుపు కోసం మధుమాసం ఎదురు చూసి
మరుమల్లెల సొగసులోన మారాకులు మురిసి పూసినప్పుడు

మిడిసి మిడిసి కురియకే వెండి వెన్నెలా
తడిసి తడిసి మూసుకున్న కలువ కన్నులా

వాలిపోవు సంజెలపై కెంజాయల రంగు ఒలికి
రేయి తిరిగి చీకటి తో చేయి కలుపుతున్నపుడు
పిలిచి పిలిచి పాడకుమా గడుసు కోయిలా
తలచి తలచి వేచి ఉన్న మావి కొమ్మలా

రాలిపోవు ఆకులేరి రాదారుల తీరు మారి
చలిగాలులు శిశిరానికి సెలవు పలుకుతున్నప్పుడు

-స్వాతి